CXIV.

1319, Juni 24. Avignon.

Papst Johann XXII. befiehlt dem Dompropst, Detentoren von Klostergütern zur Herausgabe derselben zu zwingen.

Johannes episcopus servus servorum dei dilecto filio . . preposito ecclesie Wratislaviensis salutem et apostolicam benedictionem. Significaverunt nobis dilecti filii . . abbas et conventus monasterii in Kamencz, Cisterciensis ordinis Wratislaviensis diocesis, quod nonnulli iniquitatis filii, quos prorsus ignorant, decimas, census, redditus, terras, domos, possessiones, castra, villas, grangias, piscarias, prata, nemora, instrumenta publica, legata, pascua, molendina, libros et quedam alia bona ad monasterium ipsum spectantia temere ac malitiose occultare et occulte detinere presumunt, non curantes ea eisdem abbati et conventui exhibere in animarum suarum periculum et dictorum abbatis et conventus ac monasterii non modicum detrimentum, super quo iidem abbas et conventus apostolice sedis remedium implorarunt. Quocirca discretioni tue per apostolica scripta mandamus, quatinus omnes huiusmodi occultos detentores decimarum, censuum, reddituum, librorum et aliorum bonorum predictorum ex parte nostra publice in ecclesiis coram populo per te vel alium moneas, ut infra competentem terminum, quem eis prefixeris, ea predictis abbati et conventui a se debita restituant et revelent, ac de ipsis plenam et debitam satisfactionem impendant. Et si id non impleverint, infra alium terminum competentem, quem eis ad hoc peremptorie duxeris prefigendum, extunc in eos generalem excommunicationis sententiam proferas, faciens eam, ubi et quando expedire videris, usque ad satisfactionem condignam solenniter publicari. Datum Avinione VIII. Kalendas Julii, pontificatus nostri anno tertio.
Jac. G.

Or. Perg. Bleibulle an einem Bindfaden.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 10, Urkunden des Kloster Kamenz. Hrsg von Dr Paul Pfotenhauer, Breslau 1881.